ឧត្តមភរិយាទ្រាំឈឺចាប់ តែមិនដែលរអ៊ូប្រាប់ស្វាមីទេ!

ឧត្តមភរិយាល្អ ជាភរិយាគ្រប់លក្ខណ៍តែងតែប្រតិបត្តិគោរពស្វាមីយ៉ាងល្អ និងបម្រើមិនឱ្យហ្មងឡើយ។ ប៉ុន្តែសង្គមបច្ចុប្បន្ន​វាបានឃ្លាតឆ្ងាយបន្តិចម្តងៗពីច្បាប់ស្រីដែលបានចែងនៅក្នុងគម្ពីរក្បួនច្បាប់ដើម ដែលជាហេតុនាំឱ្យបាត់បង់នូវប្រពៃណីទំនៀម​ទម្លាប់មួយចំនួនរវាងស្វាមី និងភរិយា។

អ្វីដែលមិនចម្លែកនោះ ពេលនេះក៏នៅមានដែរស្ត្រីដែលតស៊ូដើម្បីគ្រួសារ ដើម្បីស្វាមីជាទីស្រឡាញ់របស់ខ្លួន។ ដូចជា ការ​មើល​ថែកូនបានយ៉ាងល្អ ធ្វើការងារផ្ទះសម្បែងឥតខ្លាចនឿយហត់ឡើយ ហើយនារីល្អបែបនេះនាងតែងតែមិនចេះរអ៊ូរទាំចំពោះ​ស្វាមី​ឡើយ ព្រោះខ្លាចស្វាមីបារម្ភ។ ចំណែកនារីខាតលក្ខណ៍វិញនាងតែងមិនចេះជួយធ្វើការងារស្វាមី ចូលចិត្តដើរលេងផ្ទះគេ ដើរ​លេងយប់នឹងមិត្តភក្តិជាដើម។ ជាពិសេសនាងចូលចិត្តប្រើរបស់ថ្លៃៗ តែមិនបានជួយធ្វើការងារប្តី។

នារីដែលល្អ មានលក្ខណ៍គឺ តែងជួយទុកទុរៈប្តី ចង់ឱ្យស្វាមីបានខ្ពង់ខ្ពស់ មានយសសក្តិ និងមានចូលចិត្តសន្សំទ្រព្យជាង​សន្សំ​​បំណុលដោយការចាយវាយផ្តេសផ្តាស់។ ចំណែកស្វាមីល្អវិញ តែគោរពនិងឱ្យតម្លៃដល់នារីជាប្រពន្ធជានិច្ច មិនថាពេលណា​ទេ គឺតែងនិយាយគោរពគ្នាទៅវិញទៅមក និងឱ្យតម្លៃគ្នាទៅវិញទៅមក ទើបគ្រួសាររស់នៅមានសុភមង្គល៕